在香港,足球是真正的「夢想」

Avatar

「喺香港,踢波冇前途架!」「俾你踢到30幾歲,之後咪要轉行!」「你呢啲足球員,我出面打份工人工都高過你啦!」

 

「喺香港,踢波冇前途架!」
「俾你踢到30幾歲,之後咪要轉行!」
「你呢啲足球員,我出面打份工人工都高過你啦!」

喺香港,踢波真係冇外國咁好搵。莫講話外國,內地次級聯賽中甲,甚至中乙都分分鐘比港超好搵幾倍。在香港做足球員最冇保障,到掛靴之後,亦要為將來打算,不少球員甚至需要擔心退休之後冇飯開。如果球員想掛靴後可以唔使做,同期望港鐵憑著「可加可減」機制減價一樣匪夷所思!但正正就是這班所謂「冇前途」的足球員,無形中令到他們身邊好多人有飯開!其實在香港,很多人都是靠「足球」、靠足球員搵食!沒有了足球員,香港足運根本run不到!

香港有關足球的行業多不勝數。首先,保守估計,近十年在香港開設的足球訓練學校超過30間。每一間的工作人員、教練團隊,統統都是靠足球搵食!雖然未必全部都是正職,但奶粉錢、燈油火蠟、水電煤,都是靠這裡幫補下。除了比較有規模的足球學校之外,坊間仲有不少小型興趣班:由一個教練帶領十至二十位小朋友由幾歲開始四出闖蕩,參加各類型大大小小比賽,最初為興趣到彼此建立深厚感情,大有人在!沒有足球員做基石,哪有蕩氣迴腸的情誼?

而一直由來已久的中小學足球班、區隊、甲乙丙組教練,以及足總職員、教練導師和球證,通通都是為足球而工作。如果香港少了足球這個行業就等同斷佢地米路!說到職業足球層面的港超球隊,每一隊都涉及唔同範疇工作,球隊管理層、工作人員、領隊、球隊和青年梯隊教練團等等,他們都係圍著足球員而轉。另外,要營運一隊職業球隊仲要涉及其他行業,包括醫療、保險、地産、飲食甚至政府機構等等。體育沒有經濟貢獻?真•好笑!

少了這班被部分人認為「無前途、人工低」的足球員,整個體系就不成立了。當然現在也有不少足球員的發展不錯,但總體來說,香港足球員還是被忽視了的一群。沒有了他們堅持追夢,成為職業足球員,又談甚麼香港足球,又如何培養小朋友對足球的冀盼同興趣?俞琤說:「有時經驗捉喺手裡面,會化為老餅」;對真正擁有熱情的人來說,要把夢想埋葬地下,則寧願食狗餅!足球員追尋的夢想,不經不覺其實正影響許多人的人生!

TEXT / CHILL CHIU CHIU @club 足球

 
Koomen International Company Limited. 2021 © all rights reserved