世盃外圍賽港隊再追夢│你的熱情冷卻了嗎?

Avatar

2015年11月17日﹐香港隊在主場對中國踢成0比0﹐成為全城佳話。有報章更罕有地將其登在A1頭條。儘管有政治因素的考慮﹐那一刻香港人對足球的熱情可謂一時無兩﹐是自筆者懂事以來既頂峰﹗

但香港渡過了一個多事之冬﹐香港地新聞日日新鮮﹐資訊氾濫。香港人又要搵食﹐又要留意周遭新聞﹐同時間被四方八面的新聞淹蓋﹐生活被負面新聞變得緊張﹐最近已經有喘不過氣的跡象﹐亦正正因為咁﹐如果你們對香港隊仍然不離不棄的話﹐我敢講﹐你已經愛上香港足球了﹗

短短四個月﹐發生一連串令香港人戚戚然的新聞。先後包括有「小三TSA」令家長及小學生頭痛﹔「網絡廿三條二讀」觸動全港網民﹔「李波失蹤事件」導致全城籠罩緊張氣氛﹔「一帶一路」X40次﹔「港大罷課」促請校方檢討大學條例﹔「魚蛋革命」在新年期間加多一點愁雲慘霧﹔「新界東補選」鬧得面紅耳熱﹔「樓價大跌」可謂低處未算低﹔「高鐵追加撥款」衍生嶄新的投票方式等等。市民由政治冷惑到資訊敏感﹐再加上智能手機的推波助瀾﹐令到香港人根本沒有喘息的空間。但係﹐市民可知道在3月24日﹐港足就要迎來一場大戰﹐作客卡塔爾呢﹖

香港隊現時踢多一場,領先中國隊3分,而中國隊將會主場分別對馬爾代夫及卡塔爾。照牌面﹐中國應該贏馬爾代夫(贏了吧如無意外) ﹐而得失球中國領先香港10球。換言之﹐假如香港隊輸俾卡塔爾,而中國在當日贏到馬爾代夫﹐就會提早出線。所以香港隊起碼要拎到一分,先可以俾到中國隊壓力,當然拎到3分梗係最好啦。之後再等卡塔爾擊敗中國,香港隊就可以出線﹗

其實一場正式球賽豈止90分鐘﹖﹗由組軍﹑訓練﹑磨合﹑友誼賽再到正式比賽﹐都係有賴整個團隊一步一腳印走出來的。在這個過程當中﹐市民的關注和支持都有助提高港隊士氣﹗當然﹐要球迷坐飛機去卡塔爾支持港隊﹐相信日理萬機的香港人未必個個做到。但大台會於當晚11點55分就會有直播﹐咁次仲唔拋頭露面﹖﹗大家由而家呢一刻開始﹐要將視線再次移回港隊﹐做港隊第12人﹐令港隊燃起出線希望﹗

TEXT / CHILL CHIU CHIU @club足球

Koomen International Company Limited. 2021 © all rights reserved