做人不要太…
球場十誡,你犯過幾多條?

Avatar

放工到球場,大家都想踢番場波,輕舒腳頭兼出身汗。踢完之後成班friend食飯吹水,開心就是如此簡單。但總有些人,要做神憎鬼厭既行為。筆者綜合各路足球發燒友,得出球場十誡。球場十誡,你自己又犯過多少條?

1. 遲到早走
還有5分鐘就開波,人仲未見,電話中說快到。有時剛巧只得7個或者11個開波,到開波也未出現,令球隊要踢少個,被對手壓住來踢,隊友上氣唔接下氣。結果遲了5分鐘等到成隊經已疲於奔命,甚至落後一球真係X你都費事。最燥係踢到半場話要早走,明知地樁唔夠人係都要走,趕著回宮覆命嗎?!「原來係約觀音娘娘食飯,食遲一陣會胃酸倒流嗎?!」

2. 侮辱對手
踢波其中一樣好處,就係由8歲到80歲都可以一齊踢。不過有時面對的對手,實力和年齡可能爭好遠,又或者對面確是老弱殘兵,作為後生或有球,就應該多一份尊重。其實盡力踢已經是尊重。但如果一邊踢一邊恥笑對手確實冇品。所謂山水有相逢,剃人頭者,人亦剃其頭!

 

3.球場黑洞
百忙抽空到球場,無非想過下波癮踢下波。但係遇著「黑洞」隊友,就真係冇癮。個波去到佢腳下永不會交出,當正自己美斯係都要扭,扭到個波俾人搶到為止。 10次扭到一次又如何?!其餘9次要隊友令隊友跑到成隻狗咁追返。冇架,你自私連累隊友,下次不用問隊友點解咁耐沒比賽,因為少你一個唔少!

4.聲大冇貨賣
球場判官在當今球壇已經不合時而,但偏偏有人去做。踢波期間又話這個不對又哪個不應該,煩過西遊記羅家英扮的唐三藏。由開波一直「伊伊哦哦」到完場。最可悲係球技生疏。令到隊友想專心踢下波都不能。更極端的行為自己踢到人犯規就說成是合法衝撞,對手踢到他就喊打喊殺,這種人令隊友也不屑其行為。

5.西面大帝
同一隊比賽,最重要團結,槍口一同對外。但隊中總是人不滿自己隊友,自己交失波就正常,隊友交失就立即西面。講到尾,你以為自己是誰?要整隊波為你服務嗎?咁好波你自己踢哂佢囉,這種態度真係令到隊友全無士氣,而且更損友誼!

6. 問人借架撐
比賽帶齊應有裝備是基本態度。但身邊總有隊友成日帶漏野,有時又冇帶襪有時又冇帶PAD。最慘係每人都只係帶自己的,沒有人會帶多一套驚你冇帶掛?最HURT係佢問後備球員借(可能是你),而且更說﹕「你今場都未必有得踢,借對PAD比我先啦。」做後備感覺已經不好,還要俾人hurt一hurt,確實係童年陰影!

7.有波先跑
落得球場,邊個想輸但遇著啲隊友唔生性真係沒法子。如果有隊友自命天之矯子,只留在前場不參與防守,還要有球在腳才跑。隊友傳歪少少就不追,一直企在前場等,令到己隊好像踢少一個。你以為自己係老細呀?!」老實說,球場上人人平等,點解自己唔跑要人地跑哂呢?係咪俾到你就一定入到先?如果唔係,麻煩你留喺場邊抖下先啦。

8.負能量L
居住香港城市壓力大,身心容易充斥負能量但去到球場都不要將負能量給隊友照單全收。傳失又插,射失又插,失一球又話無希望。言談間沒有一件事是正面的,令隊友烏雲蓋頂,運氣也自然流走!不斷長他人志氣,滅自己威風。以後想有人同你一隊都很難!

9. 詐諦唔夾錢
有時衛生波要book場買水,每人夾幾十蚊絕對合理。踢「網league」也要俾球證費。但總有人側側膊」不付錢,扮有急事走先沖涼。這種肉酸行為只會顯得出你有幾cheap。幾十蚊就買起你人格,可見你人格有幾卑賤呢!

10.  提人老母
踢波有時激起上黎,嘈兩句在所難免。但係只要有人一提人老母,一場大戰隨時發生。「X你老母」這四個字相當敏感,就好似一句咒語一樣,只要有人念出呢句咒語,就會有人立即「著燈」。小則動手、大則群毆。其實筆止球場,平時也少講為妙,萬一變成口頭禪,落到球場你就有排煩了。

每個地方都有背後的潛規則,球場也不例外。不想被隊友排斥或不想多生事端,記住以上10誡千祈不要犯。球技不高不緊要,最緊要樹立好球品。球品好,人品自然好!

Koomen International Company Limited. 2021 © all rights reserved