施丹轉身成皇馬主帥│回顧球王教波迴異命運

上月底,巴塞飛左去日本贏埋世冠,連埋西甲、歐聯、西班牙盃及歐超盃做左五冠王,身為對手的皇馬當然眼紅。但自己唔爭氣,最近4輪西甲,巴塞3場都相繼失分,皇馬都把握唔到超前機會。志在天下的皇馬主席佩雷斯,自然唔收貨,昨天就請了季初才上任的賓尼迪斯食鼓椒炒鱿。死者而爾,唔係,係逝者如斯,走左的人我地就唔再講,重點是新帥的名字——施丹 。

Ting Chan

 

皇馬當年5條A之一的施丹,是三屆世界足球先生得主,曾效力祖雲達斯、皇馬等頂尖球會。不但贏過聯賽冠軍,更帶領法國贏到1998年世界盃同2000年歐洲國家盃,除了是法國人心目中嘅英雄,亦是少有可躋身球王之列的球員。

話施丹好波,就好少人 Say No。但若你問,施丹教波又好唔好?咁就好少人答到。事關雖然 06 年一退役就鋪路要當教頭,於銀河艦隊掛靴後,就留返係艦上擔任助教及訓練工作,更曾在2014年以助教的身份跟隨皇馬贏得第十冠。但是……

 

 

但自己帶隊的經歷就唔多,無帶過頂級球會一隊,只係做過皇家馬德里B隊教練。仲要係上賽季先接手,無讓人眼前一亮的表現,皇馬B隊繼續留返係西丙第二小組。到現在為至,施丹一共帶領B隊踢了57場比賽,獲得26勝17和14負的成績,得勝率還有好大進步空間。

 

 

不過這又唔令人意外,球壇上踢而優則教的例子唔係話無,但愈接近球王這寶座的男人,做教練時同樣成功的機率卻不高。鳳毛麟角總會有,先講兩個得咗的碧根鮑華告魯夫
 
 
足球皇帝碧根鮑華,自己就1966、1970和1974年參加過世界盃足球賽,1974年仲率領西德隊奪冠。就係1986年同1990年做帶領西德隊參加世界盃賽,並於1990年奪得世界盃冠軍。佢最威水的當然是成為歷史上身為隊長和主教練都獲得過世界盃冠軍的第一人。
 
 
全能足球之父告魯夫,1973年轉會到巴塞前,已為阿積士拿下了6次荷蘭聯賽冠軍、3次歐冠杯等重要冠軍。在巴塞他為該隊摘下久違十多年的西甲冠軍,自己更贏得生涯第三個歐洲足球先生殊榮。之後執教阿積士嬴取了荷蘭杯與歐洲杯。告魯夫在任教巴塞8年間,帶領該隊自91年起連續四次奪得西甲冠軍,建立了為人熟知的夢幻隊伍。
 
 

講球王教波又點少得佢,馬勒當拿是不少人心中的球王,1986世界杯是其巔峰之作,不論是一扭六或是上帝之手,也是可觀性與話題性並重,他更是當屆世界盃最佳球員。球隊方面帶領拿玻里贏了幾屆意甲冠、亞軍,更在1989年贏埋歐洲足協盃之但係他做教練的表現卻得啖笑,教練生涯起步執教阿甲球隊,表現已難以服眾。換到更大的舞台,帶領阿根廷2010年世界盃,可惜就被德國炒了4隻光蛋,成為一大污點。

當然,前人做成點就唔一定突破唔到,死敵巴塞近年也有哥迪奧拿、安歷基等球員轉做少帥成功例子。43 歲的施丹在皇馬終究是成功,定係賠上了一世的英命,我們到季尾再用成績定英雄。等唔切?先睇睇今個星期日凌晨皇馬主場迎戰拉科魯尼亞,新帥上任又有無起色?

 

最後,送上那年我們一起看過的施丹轉身。

TEXT/ TING
IMAGE AND VIDEO/ INTERNET

Koomen International Company Limited. 2021 © all rights reserved