香港球員的Package又有誰理?

Avatar

現在港女揀男神要講「package」,除了「坤哥」之外,「package」這個字最近也被瘋狂搜尋,情況某程度仲勁過年前「gathering」。在多元化社會,「package」真係好重要。要評定一個人,就要視乎甚麼額外因素成就他。雖然筆者幾可肯定那位港女係從事保險或美容一類講求「package」銷售模式的行業,但她確實一語道破現實。好多香港人話香港足球員屎波,冇料到,入球場睇波不如翻屋企睇「愛回家」,其實要提升香港足球員能力,當中的「package」都好重要﹗

 

提升香港足球員的「package」覆蓋的範圍很廣闊,但在眾多要點之中,場地應該是最基本因素,而且影響深遠。還記得好幾年前,曾經有外援來港試腳成功並即將註冊,但就因為適應不到仿真草訓練場而「走夾唔抖」,仿真草近年更加被採用於港超比賽場地。正因如此,不少球員因為在比賽去到盡而受傷,當你在仿真草地不斷急停轉身,腳面狂抽如果不覺刮到草地,半月板、十字韌帶首當其衝受損,嚴重的話更加要同足球生涯講拜拜,而九龍灣公園更加堪稱「殺人球場」,不少球員在那裡受重傷而提早收咧﹗

踢過仿真草的人都知道,落地好容易因為會「啜」住而受傷,而家仲話仿真草嘅膠粒會致癌,踢波有機會踢到生cancer,你都咪話唔驚?﹗所以好多時,你會見到球員會就住就住,不敢去得太盡,唔係「渣流灘」,而係為左避免受傷。一傷左就手尾長,分分鐘連一紙合約都冇埋,所以而家有唔少球員更加要著仿真草boot甚至跑鞋練波。試問訓練著這款鞋,又要就住踢,比賽又著另一款,踢法又要調節,點叫香港球員踢得好呢?﹗筆者曾經參與過港超球隊訓練,就算你唔落地,踢得耐膝頭哥都會痛。最慘係在太陽最猛烈的時候練波,通常港超聯球隊都是在這些時段練習,個仿真草地真係曬到「辣」腳。嚴重仲會「辣」到生水泡,搞到練不下去。香港人逆境自強、排除萬難、迎難而上嘛,咪頂硬上囉﹗但有冇人諗過其實順境可以令球員更強?要更強就要多方面配合。再講,普遍練波時間每日一課,每節個半鐘,之後就被「場管」趕走。你話想在場邊猜下波做下體能又話阻住下一節的使用者。

我敢說香港足球員的技術雖然未到世界級,但毅力同態度肯定不遜於巴西、西班牙、德國等國家球員﹗作為球員,比賽一定全力而赴,話之佢係草地、仿真草、沙地定係跑馬地;作為球會,能夠租到一個穩定場地已經好感恩。而作為足總、康文署、甚至政府又自問是不是傾盡全力支持呢?到底起仿真草場係為了球員?提高香港足球水平?還是為了控制管理成本,又方便又慳錢?正所謂「打鞭爐最緊要係個爐,踢波最緊要係個場」﹗其他提升香港球員水平嘅「package」重有好多,例如其他配套、政策等等。由於字數有限,未能盡錄﹗

TEXT / CHILL CHIU CHIU (METRO DJ) @club 足球

Koomen International Company Limited. 2021 © all rights reserved