Apple聖誕驚喜但要排到新年先有
自家頭戴式耳機AirPods Max突襲上架
都唔知睇過幾多次「諜照」，又話就出就出，一直都只係傳Apple今年會推出自家頭戴式耳機，大家連名都幫佢諗好，一直話叫「AirPods Studio」。上次，「One More Thing」發布會時，我哋都已大膽推測佢會推出，點知……當然無開口中，唔單止令咁多位讀者失望，我自己都好失望。正當已將件事放埋了一邊，就係今晚，Apple「偷襲」送份聖誕驚喜俾大家，仲即日（8日）可訂購，12 月 15 日就開售，不過就唔叫「AirPods Studio」，係叫AirPods Max，5款顏色選擇，立即同大家睇睇！
5種顏色選擇
官方講法：太空灰、銀色、天藍色、綠色與粉紅色5種顏色。
最穩陣就揀黑白（即是太空灰同銀色）。
如果想襯返你嘅新iPhone12 Pro、iPad Air同隻Apple watch series 6嘅藍色色調，咁自然天藍色先係你嘅首選！
隨AirPods Max仲會有返個同色系嘅智慧型耳筒套，真係襯到一絕。（當然都仲有Lightning 至 USB-C 連接線。）
自家首款頭戴式耳機
AirPods Max係Apple首款自家頭戴式無線降噪耳機，香港定價為$4599。
最快你今日（8日）訂購，就可於15日至17日收到，官方也話15日正式開售。但你以為趕得切聖誕可擁有，佢一出就爆賣，一排就排到新年，係農曆新年後先有，2月尾先出貨！
全新無線罩耳式設計，結合獨有的聲學設計、H1 晶片、由先進軟體推 動的運算音訊技術，透過適應性 EQ 功能、主動消噪、通透模式與空間音響效果。
嶄新聆聽體驗
電池續航力方面，Apple就話開住主動式降噪功能與空間音訊效果，都提供高達 20 小時高度傳真音色、通話時間或電影播放。
因用咗40 mm Apple 設計的動圈驅動器，令到無論係低音、中音或高頻，你都可以將每個音符清楚聽見。加上獨特的雙釹環形磁鐵電動機，就能帶來的就是 1% 以下的總諧波失真。
耳機設計 引入「錶冠」最吸引
AirPods Max 嘅透氣網狀織面覆蓋整個頭帶，以分散重量並降低頭部壓力。不鏽鋼頭帶框架為不同的頭型提供支撐度、彈性與舒適度。
耳罩軟墊使用聲學工程記憶海綿，有效製造密封效果，並與頭帶相連，可平衡並分散耳罩壓力，讓兩個耳罩都能獨立旋轉以貼合不同使用者的頭型。
仲有個數碼旋鈕，即係Apple watch個錶冠，Apple將這個旋鈕設計帶到AirPods Max上，你可用佢來控制音量，並能播放、暫停音訊，跳到下一首、接聽或掛斷電話，亦可啟動 Siri。旁邊的長形按鈕就係主動消噪按鍵，一鍵切換降噪模式和通透模式。
