難聽過粗口
踢波撩交打必備5句說話
冬天天氣風高物燥，聖誕節又食了大餐，加上燒烤、打邊爐等。個人的確十分燥底，有時本身諗住踢下比賽出身汗，誰不知不其然被對手辣著，好容易著哂火，控制唔到自己。小則口角，大則動武。連筆者平時在球場屬謙謙君子類型，也因對方某一兩句說話而不自覺大動肝火。如果唔想俾人提早開年，切記不要說以下說話，避免禍從口出，招惹血光之災。
- 「唔撞得返去打乒乓波啦！」
明明踢衛生波，大家就住踢。誰不知有隻「蠻牛」橫衝直撞，粗野攔截，仲一而再再而三被他成個炒起，其他人也不禁問他: 「玩波啫，使唔使呀？ 」本身一句Sorry就小事化無。但他回應一句: 「唔撞得番去打乒乓波啦！」呢句雖然沒有粗口成份，但他根本沒有歉意，仲大大聲，的確燥到極點。
- 「條友死右腳架咋！」
踢波唔係用左腳就係右腳，有時吸多兩下，就有對手當自己是先知一樣。向隊友用鄙視的句子大大聲咆哮: 「條友死右腳架咋！ 」此句本來無傷大雅，但聽落有骨，仿佛被人抽了水，但無法還擊。不過無名火亦隨之而起，此時會有隊友勸你: 「當他發噏瘋，美斯也是死左腳。」
- 「輸唔起呀?！」
踢波勝敗乃兵家常事，接受失敗也是生活中要學習的地方。賽事去到80分鐘，落後一球，但你無心之失侵犯對手，已經say哂sorry。不過對手卻認為你惡意，還凶神惡殺回應: 「輸唔起呀？！ 」場波未踢完，何謂輸唔起呢？道行高就用入球來回敬他，不過唔少情況係，尋日打完邊爐個人燥燥地，就會話：係呀之後醒佢一拳。
- 「呢個唔使mark架！」
比賽當然會施展渾身解數，希望協助球隊贏波。但當你拎到波打算引球推進，對手後防向全隊隊友告誡: 「呢個唔使mark架! 」當然事出必有因，可能你有幾下真係被對手看穿。但試問顏面何存，仲唔火都嚟埋？
- 「點L樣呀DLLM！」
踢網league有唔同類型既對手，有球隊踢人就得，人踢佢就唔得。嘈多兩嘈仲問候人家娘親，對於孝敬父母的香港人，聽到呢句平時出名善良的都會變成野獸。任憑隊友如何阻止，也無法避免一場大廝殺！
其實令人憤怒又並只5句說話,仲有邊句係會令你特別氣憤呢？
