8招在足球場上立即變球星

每個球員,都希望在球場上成為焦點。無奈地,細個掛住讀書,冇乜練波(好似係),搞到成日喺球場做陪襯品。但今時唔同往日,當你做到以下8項,包你喺球場即刻變球星。

 
 

1.貴版波Boot+波衫波褲
工欲善其事,必先利其器。每次落場都作出悉心打扮,如此一來顯得你尊重足球,尊重隊友。一剔或三間波衫波褲係基本。如果有對貴版BOOT,眼利的敵人一定覺得你係非池中物。如果加條膝帶更加暗示你曾經勇戰沙場而受傷。夠頭髮的話,gel個Allback頭在跑動時睇落更快。 

2.揀翼鋒或輔鋒位置
講到明係球星,一定唔可以俾人鬧。後防失誤和門前失機絕對會俾人講一世。所以,翼鋒或輔鋒最適合不過。後面失波你冇直接責任,前面入唔到波首當其衝歸咎於前鋒。有時,從側邊或後上對方門前,分分鐘有雞執,到時想唔做球星都幾難囉。

3.失波後,做一個無奈表情再作出鼓勵
作為一個球星,器量十分重要。當己隊失波,難免會有隊友垂頭喪氣。呢個時候,你望住後衛或者龍門,對佢地做一個無奈表情,之後再講啲鼓勵性說話。令隊友覺得你唔會怪責佢地,仲充滿正能量的樣子(簡稱正能樣)。順帶一提,記住揀平時唔出聲個啲隊友嚟望,唔係到時俾人鬧番轉頭話你唔返後防守就唔係幾好啦。

4.當隊友入波時,第一時間擁上前慶祝
要吸引眼球,當然要叨下光。當有隊友入到波嘅時候,即使你整個進攻沒有參與,也要用9秒9速度飛上去慶祝。加多兩錢肉緊,嚟個振臂高呼,個啲睇唔到入波嘅人見到仲以為係你入添。番後場嘅時候,向出面拍下手掌,多謝一下觀眾嘅支持(掃地嘅亦係觀眾),呢啲基本禮貌姐。

5.罰球或十二碼時,拎起個波再俾隊友射
成人之美絕對有球星既風範。正所謂顯露不如藏拙,冇番咁上下把握都唔好拎嚟射。用手拎起再俾隊友射,既唔貪功又可以造就隊友,呢份差事多做無妨。一個唔覺意佢真係入咗,你都有間接功勞丫,邊個話助攻唔可以用手架?!美斯都做啦,你唔係唔跟呀?!

6.喺前場,永遠站在後衛隔離或身後
在前場時,記得唔好主動攞波。在敵方前場佈滿後衛,一個唔覺意攞甩腳或交失波,隨時俾人鬧到飛起。進攻嗰時,企埋個後衛度,隊友自然唔會交俾你,如果被人截咗,都唔關你事。又或者企喺越位位置,當球證吹越位,大大聲話佢唔識吹,雄風咪咁黎囉。

7.回後場插花同No Look Pass
想好波其實唔難,當人地全軍退守時,得番一兩個敵人喺自己後場,你返去搏一搏腳,絕對無壞。6個猜人兩個間中來一個插花或NO LOOK,騷一騷QUALI,技癢丫嘛!記住傳到就好一支箭跑上去(傳得多會被敵人睇穿),再叫隊友交個直線,雖然通常都唔交。

8.踢完波Post相上網
踢完波之後,梗係要映番張相,唔係咪白踢?!最好自己早15分鐘去到球場映定先,擺好對boot既位置,放喺草地上面,再用埋濾鏡,踢完之後post上Instagram。內容唔使多,再加啲語言偽術大概係:「今場贏3:0,好耐未試過入兩球lu出咗一身汗,多謝你同我出生入死! #nike #futsal #soccer #撐 #香港」出咗呢個post,follower想唔過千都幾難,咁咪場內場外都係球星囉

TEXT / CHILL CHIU CHIU @club 足球
IMAGE/ INTERNET

 

Koomen International Company Limited. 2024 © all rights reserved