如果球壇引入23條…
近日網絡23條喺社會引起熱烈討論，在網絡上，反對嘅聲音固然比贊成嘅多。因為有關條例會令到有關｢改圖、惡搞、改編歌曲｣等。都可能干涉有關法例而犯法。而最吊詭的是，政府可以繞過原創人執法，即就算原創人願意俾你｢改圖｣或｢惡搞｣，政府亦都可以執法。有唔少網民自認｢花生友｣，有｢改圖惡搞｣便看看，認同便｢like｣下，冇亦無所謂，對生活冇乜影響，完全冇切膚之病。筆者從來不是二次創作高手，同一般｢花生友｣無異，只係對足球有份熱誠，閒時落街場跟隊恰下細路，同阿伯過日晨。筆者嘗試代入其他網民，如果有朝一日國際足協立法，訂立｢足球23條｣，唔知足球界又會變成點呢…
第一，受全世界吹捧的巴塞踢法｢Tiki-Taka｣，因為原創者屬於巴塞，假若有任何球隊將他們的踢法加以改良，再變成自己嘅踢法及戰術，即有機會違法﹗就算依家效力阿仙奴的阿歷斯山齊士之前踢過巴塞，喺阿仙奴都唔能夠用任何巴塞踢法，因為巴塞先係原創者﹗如果只要睇到佢用短傳撞牆，頻繁跑動和有意識地保持控球，亦可能違法﹗
而射12碼除左｢一係入，一係唔入｣之外，仲有機會｢二次創作｣左人地射法自己都唔知。一旦足球23條通過，派路嘅標誌式12碼｢chip｣射，如果有球員想使用、或將｢chip｣射改成｢cheap｣射，亦都有可能犯法。換言之，早前銀牌四強東方對南華的12碼，陳七亦可能已經犯法﹗
其次，｢施丹轉身｣聞名天下，有教練為增加小朋友對足球興趣，在教案中都會加入｢施丹轉身｣的環節。如果小朋友發揮創意，喺｢施丹轉身｣之前或之後加入其他動作，便是二次創作；或轉身時得不及施丹瀟灑，便是惡搞。做｢施丹轉身｣做到入男童院，家長仲會俾小朋友踢波嗎﹖﹗除了以上嘅技術之外，｢碧咸七旋斬｣、｢洛賓的軌跡｣、｢巴洛迪利騷肌慶祝｣等等，只要｢主觀性｣認為有二次創作成分便無一幸免﹗
從｢網絡23｣搖身一變成為｢足球23｣，這樣便發覺，原來｢足球23｣會影響球員的發揮，限制所有球會進步空間，阻礙小朋友的創意﹗而且最受影響的竟是球迷，令球迷睇少咁多好波，家長又唔俾朋友踢波，就會令足球出現斷層，創意被埋葬﹗唔講唔知，原來最近豁免幾種創作方式，只要｢戲仿｣、｢諷刺｣、｢模仿｣、｢滑稽｣、｢評論時事｣及｢引用｣的公平處理獲得豁免。咦﹗｢滑稽｣都得﹖咁陳七應該冇事喎﹗
