曼聯「7號仔」的啟示
從曼聯的歷史當中﹐7號球衣可謂具有特殊意義﹐它不但代表著這個球會的靈魂﹐甚至揭示球隊接下來的命運﹗在曼迷心目中﹐穿著7號球衣既球員都充滿著傳奇色彩﹐當中許多位都曾帶曼聯走向巔峰｡今日的7號仔荷蘭新星迪比﹐又能否帶領曼聯走出陰霾﹐令曼聯再次拾回昔日的光輝呢?
先上一下歷史課﹐60年代的7號有佐治貝斯﹐到80年代就有白賴仁笠臣｡以上兩位響噹噹的名宿在球壇上受萬人敬仰﹐對曼聯的貢獻更加無容置疑﹗再讓筆者帶大家跳去90年代﹐開始有80後球迷熟識既大帝──簡東拿｡他的霸氣就好比現在的伊巴﹗大帝在曼聯掛靴後﹐到碧咸，然後是C朗｡這幾位舉足輕重的球員﹐每次掂波都足以改變賽果｡呢3位7號做到無縫交接﹐除了本身實力之外﹐當然還有費爵爺的獨具慧眼親自欽點｡1到2016年﹐迪比穿的7號﹐由雲高爾決定｡到底雲高爾是對荷蘭同鄉特別有感覺?還是覺得迪比將來可媲美碧咸C朗?定還是佢根本不明白曼聯7號的意義呢?
值得一提的是﹐每當曼聯7號球員的狀態去到top fit﹐經驗同技術都亦已成熟﹐曼聯一定順風順水﹐遇神殺神﹐遇佛殺佛﹗碧咸同C朗就係當中佼佼者｡雖然佢地初出茅廬之時﹐都有過一段迷惘期｡之不過﹐佢地好快就企穩陣腳｡當然﹐都要配合天時地利人和｡簡單黎講﹐嗰個年代﹐只要｢搞得掂｣費爵爺﹐仲有咩｢搞唔掂｣﹖﹗當你見到曼聯件7號著唔暖﹐著唔多過兩年﹐就代表著曼聯狀態飄忽不定﹐時高時低｡而近幾年著左一年就要除番落黎既包括2012/13既華倫西亞同2014/15既迪馬尼亞﹐而2013/14更加成年冇人著添﹗
如果喺依家就決定迪比唔夠班﹐雲高爾既眼光係錯﹐好似有點不公平｡因為喺1995年4月2日﹐碧咸首次為一隊上陣｡當時他23歲｡到1996/97賽季﹐簡東拿宣佈掛靴﹐費格遜對碧咸寄予厚望﹐將7號球衣授予碧咸｡再到98/99既3冠王﹐嚴格黎講﹐咸爺都用了3年時間成為曼聯ICON去證明自己｡而去到2003/04賽季﹐碧咸離開曼聯遠走皇馬﹐7號球衣則由費爵爺欽點俾一個當時冇乜人識既C朗(起碼當時筆者唔識)﹐當時C朗僅有18歲｡而C朗經歷3年成長期﹐已進化到一掂波曼聯就叫糊既地步｡結果在2007首嘗聯賽冠軍滋味﹐之後仲得勢不饒人連奪3屆英超冠軍﹐同時在2008年拎埋歐聯﹐而個人亦喺同年奪得世界足球先生｡碧咸﹐C朗呢兩個咁鮮明﹐咁出眾既球員同時都有一樣成功必備因素-時間﹗
第1年適應英超節奏﹑第2年配合球隊打法﹑第3年建立自己風格｡今年22歲既迪比﹐又有冇3年時間比佢進化同沉澱﹖喺依家急速社會﹐講求｢即食文化｣﹐就算迪比真係咁好彩有3年時間﹐恐怕雲高爾到時都冇眼睇了﹗
TEXT / CHILL CHIU CHIU @超club足球
