新「二奶王」高普
剖析利物浦新帥為何無緣冠軍

自高普成為利物浦主帥之後，球隊上下一心，在各條戰線皆拚盡每一口氣。在人腳方面與羅渣士比較上沒有太大的轉變。但就將激情原素注入利記，贏得利迷掌聲。佢亦令到球員甘願為球隊賣命。近期代表作，就係歐霸盃8強親手手刃多蒙特，再贏維拉利爾殺入歐霸決賽。可惜最終對陣西維爾輸1:3失落錦標。最吊詭既係，高普近5年分別帶領多蒙特殺入3次決賽(2次德國盃同1次歐聯)，和利物浦2次決賽(聯賽盃同歐霸)皆全數敗陣。到底係高普冇冠軍運，定還是佢根本冇料到? 就讓筆者冒著生命危險來剖析一下吧。

1. 領先時踢法進退失據
高普帶領的球隊以高位迫搶聞名。但在決賽時刻，領先1:0縮後少少亦無可口非，但並沒其他改變踢法，眼見只採取有波進攻冇波防守策略。間接令到球員進退失據，被對手壓住來踢。所謂九守必失，況且殺得入決賽亦非善男順女，走甩半次甚至傳失一球，足以致命。有利粉表示，有時真係好想利記先輸一球先。點解?因為在比賽當中，利記往往能夠追平甚至反勝。遠既唔講，由歐霸8強開始，第一回合對多蒙特，36分鐘領先1:0，但48分鐘被追平。第二回合反而落後兩球下最終反勝4:3。而4強第一回合輸俾維拉利爾0:1，第二回合輸一球黎踢卻能贏3:0，總比數贏3:1晉級決賽。決賽對陣西維爾之前高普聲言打防反，在領先一球下，球員習慣以往的迫搶，導致在當日有點迫又唔係，唔迫又唔係既感覺。結果在下半場連失3球，再次同獎項擦身而過。

2. 領先唔換防守球員
不少主帥在領先時，都會換出一名前鋒換入一名防中，甚至｢泊大巴｣。但高普絕少這樣做，這違反了他的風格，他領先時甚少踢多個中場或後衛，直至被反超才換走後衛換入前鋒搏殺，有時甚至只係位換位，決賽當日被反先1-2才作首個換人調動，卻已為時已晚。決賽關頭，球員或多或少都會比較緊張，他們需要更清晰的指示，你換入什麼人就怎麼踢，換入防中便守住踢。當決賽領先換入防守球員，一方面可舒緩後防壓力，另一方面球員亦明白要以防守為主。你不換入防守性球員，其他球員便照原本部署踢，結果被捱打，在長期受壓底下犯錯而導致失波。

3. 換人不夠決斷
去到決賽，咩都會發生，11個球員只要有一個｢發波瘟｣或者犯錯一次， 䢫時無緣錦標!而且亦要考慮一點，就是唔排除陣中有一些所謂的｢練習球員｣，因為他甚少踢決賽而表現下滑。譬如該球員平時值80分，去到決賽緊張心態受影響，得番50分，甚至更低。高普從不作懲罰式換人。這種舉措一旦遇到所謂的｢練習球員｣就無法阻止球員的第二次犯錯，等到第二次犯錯才忍痛換走，球隊已經失掉兩球了。舉例說，今季由西維爾轉投利記的左閘摩蘭奴，決賽當日面對舊東家可以用｢廢｣來形容，其實一早應該被換走。他賽後亦遭各利記名宿圍剿，包括加歷查、麥馬拿文及奧雲等。而加歷查更公開表示：「高普，轉會委員會，任何人都好，請盡快簽一名新的左閘！」

4. 錯判球員體能
球員在決賽時難免緊張，體能因而大打折扣。如果照樣採取迫搶踢法，會消耗己方球員體能，令對手在比賽末段有機可乘。而長期高位迫搶亦令球員在90分鐘沒有喘息的空間。之前帶領多蒙特時，萊斯、葛斯都因受傷或倦勤，導致球隊略欠完整。亦有球員因操勞過度引致啞火。日後如果利記要更有效地迫搶，可以選擇在某個時段進行全場壓迫，或針對式迫搶，即當個波去到某位敵人球員腳下，就專搶他的腳下球，這個有節奏及有部署地迫搶，尤其在決賽，或許更為奏效。

總括而言，因為高普的到來，為利記帶來一番新景象。甚至有球迷以至球員都「因為高普，所以利物浦」﹗未來或許會有其他好球員都因為想追隨高普而加盟利物浦。而且佢仲擅於激活球員。今季就激活了幾位被羅渣士唔多重用既球員，包括奧歷治、沙高、安尼簡、路夫蘭等等。另外，他眼光獨到，往往能以平價購入好球員(利雲度夫斯基就是很好的例子)。利物浦對上一次捧盃已經是2012年的聯賽盃冠軍，最後希望來季高普能夠帶領利記再嘗捧盃滋味，重展歡顏。