踢親波梗有一個喺左近
談足球場上6種PK

好多人落到球場﹐都當正自己係球星。一舉手﹐一投足﹐都以為自己散發著球星既風采。頭戴光環﹐覺得成隊波都圍住佢黎轉。呢一種人只會慢慢被隊友疏遠。正所謂球品好﹐人品自然好。你冇球品﹐冇朋友﹐成件事十分合理。唔想被人排斥﹐以下呢幾種行為千祈唔好做:

1.冇料扮四條
人冇料就要認﹐踢波同做一樣﹐係講整體的。明明自己冇射術、速度、身形﹐就唔好打前鋒啦﹗同得你做隊友大概都知你係乜野斤兩﹐仲諗住下場「連任」前鋒﹐會唔會有點妙想天開呢﹖

via GIPHY

 

2. 冇氣又唔肯出場
再鋒利嘅刀都會有生銹嘅一日﹐人老咗體能下降絕對正常。但係唔肯離場就真係論罪當誅。自己都跑唔郁仲死都要企喺度﹐仲要隊友走埋你嗰份。對唔住班正選不特止﹐仲有啲後備等緊出場架﹗其實你嘅離場幫到球隊可能仲多﹗

 

3. 幫倒忙
球隊有唔同位置﹐當隊友有危難嘅時候幫手補位包抄就係應該。不過有時幫唔到﹐仲搞到隊友鬼死咁狼狽就唔係幾好。如果自己能力不足﹐都係緊守崗位較為合適。

via GIPHY

 

4. 埋怨別人﹐不檢討自己
有人犯錯﹐佢一定第一個出聲。得把聲叫人跑自己又唔幫手追。搶到個波又要第一時間交俾佢。自己失咗波就扮若無其事。彩又自己一個攞哂﹐架就要隊友丟。

 

5. 成日撩交打
返工咁辛苦﹐落到球場都係想踢下波出身汗姐。你成日咁粗野攔截踢人,咁踢完人咪講句sorry囉﹐係要同人嘈又叫人返去打乒乓波;到人地踢到你少少就叫哂救命咁。死撐之最。

via GIPHY

6. 不在乎輸贏
11個人一齊為同一個目標進發﹐大家組織入球贏波然後相擁慶祝﹐呢種男人既浪漫喺平時返工或者喺屋企一定搵唔到。但總有啲人闊佬懶理﹐贏輸唔care﹐呢種人根本配唔起「足球」兩個字﹗

 

當一個人放在自己在高地﹐俗稱「離地」。佢會覺得自己高高在上根本唔會犯錯﹐唔需要道歉。甚至有時真係於心有愧﹐都唔駛你地班地下階層來批判。就算佢有自知之明﹐都要在眾人面前樹立一個聖人嘅形象﹔為的是自我感覺良好;為的是要受萬人敬仰﹐但其實根本輸唔起﹗成隊波11個人﹐當有10個人都唔妥你嘅時候﹐應該好好反省一下。

Koomen International Company Limited. 2024 © all rights reserved